સરખામણી અને સંતોષ ને જન્મોજન્મ નું વેર હોય એમ લાગે છે. સરખામણી એ અસંતોષ ની જનની છે એમ કહી શકાય .સુખ અને સંતોષ એક બીજાના પોષક તત્વ છે .
સંતોષ એવું તત્વ છે કે તે જીવનના શરૂઆત ના તબક્કે ના હોવું જોઈએ પણ હા 50 વર્ષ પછી એનું હોવું એટલે સુખી થવાનો પાસપોર્ટ .
મેં દસ ચોપડી પાસ કરી લીધી છે અને મને સંતોષ છે : આ સંતોષ નકારાત્મક છે . જ્ઞાન ની તરસ અને અસંતોષ તો આજીવન આવકાર્ય છે . પણ એક 70 વર્ષ ની મહિલા અક્ષરજ્ઞાન મેળવી ને જો ઉપરનું વાક્ય કહે તો સંદર્ભ બદલાઈ જાય છે . જીવન ના પૂર્વાર્ધમાં અસંતોષ માનવી ને પ્રગતિ માટે પ્રેરણાસ્ત્રોત બની રહે છે .પણ અસંતોષ આજીવન ના જ હોઈ શકે .અને પોતાના ભવિષ્ય પૂરતું કમાઈ લીધા પછી વિવિધ બહાના હેઠળ અર્થ પાછળની દોટ અનર્થ સર્જે છે .
અમેરિકા કે વિદેશમાં સ્થાયી થવાનો વાયરો સોરી વાવાઝોડું ફૂંકાયું છે . અહીં કહેવાતા સમસ્યાઓથી ભરપૂર દેશ જે આપણા જ દેશવાસીઓ ને લાગે છે એ દેશમાં આજે પણ એક વ્યક્તિની કમાણી માંથી એક કુટુંબ નું પૂરું થઈ શકે છે પણ વિદેશમાં બાળકો સિવાય દરેક વ્યક્તિએ કમાવા જવું પડે સામાન્ય રીતે . ત્યાં કોઈ પણ કામ કરતા શરમ ના કરી શકાય કેમ કે અહીં પોતાનું ઘર કે નોકરીના સ્થાયી હોવાની ગેરેન્ટી નથી હોતી . ભારતમાં સ્કૂટર પર જઈ શકતો વ્યક્તિ ત્યાં કારમાં જતો જોઈને મોહ જાગવો સ્વાભાવિક છે .
બીજા બાળકને સારા ટકા લાવી સારી નોકરી કરતા જોઈને પોતાના બાળક માટે એવું ભવિષ્ય વિચારતી વખતે પોતાના બાળક ની રુચિ કે ક્ષમતા વિશે ના વિચારવાથી સામાજિક અને માનસિક અસંતુલન સર્જાય છે અને આપણે જાણી નથી શકતા .
મેં એક પોસ્ટમાં જણાવેલું કે મારી દીકરીને સી એ કરવાની ઈચ્છા હતી અને એ શરૂ કર્યું . પણ પછી જે સ્વાનુભવ થયો કે અહીં પાસ થવું અઘરું તો છે અને કદાચ અઘરું બનાવી દેવામાં આવ્યું છે પણ નસીબ નો સાથ હોવો પણ આવશ્યક છે . એ નિષ્ફળ રહી . 3 વર્ષ આર્ટિકલશિપ નો અનુભવ થયા બાદ કોર્સ પણ બદલાઈ ગયો એટલે નવેસર થી તૈયારી ..વર્ષો બરબાદ કર્યા પછી જો પાસ થવાની ગેરેન્ટી ના હોય તો એ માર્ગ છોડવો જ સારો . પણ હા એ અનુભવે સારી નોકરી માટે જરૂર મદદ કરી . અહીં અસંતોષ કે સરખામણી ની નહીં પણ સંતોષ થી માર્ગ બદલવો યોગ્ય છે .
40 કે 45 વર્ષ પછી શરીર ઘસાવા ની શરૂઆત થઈ ચૂકી હોય છે . શરીર ની ગતિ ધીમી પડે છે . જીવનમાં સ્થિરતા આવી ગઈ હોય તો સ્વસ્થતા થી વાન પ્રસ્થ અપનાવી લેવું અને જીવનની દોટ માં જે ચુકી જવાયું છે ત્યાં શક્ય હોય તો નજર દોડાવવી જરૂરી . પત્નીને સમય આપો . સંતાનો ના હાથમાં કારોબાર આપો બેન્ક બેલેન્સ અને મિલકતો નહીં .શક્ય હોય તો દેવું પણ નહીં .
જીવન જીવવું છે કે પસાર કરી દેવું છે એ બે છેડા વચ્ચે સંતોષ નું લોલક છે અને આ ઘડિયાળ મધ્ય થી કોઈ એક છેડા તરફ જ જઈ શકે છે .
