આપણું શિક્ષણ : (1)

આજકાલ અમારા વડોદરા માં સ્કૂલ ની ફી માં વધારા વિરુદ્ધ વાલીઓ ની ચળવળ ચાલી રહી છે અને મેનેજમેન્ટ ને ઝૂકવું પડે છે .. સારી આબોહવા છે .પણ મોંઘવારી શિક્ષણમાં પણ નડે છે . સરેરાશ જોઈએ તો આપણા જમાના માં આપણું જે કોલેજ સુધી ના શિક્ષણ ના ખર્ચમાં આપણું બાળક કે જી સેક્શન સુધી જ ભણે છે ..અને એ સરેરાશ જળવાઈ રહી છે … ત્યારે પ્રશ્ન ઉદ્ભવે છે શિક્ષણ એટલે શું ??? અને શાળામાં શિક્ષણ ઉપરાંત બીજું શિક્ષણ હોઈ શકે કે નહિ ???
કોઈ પણ વસ્તુ વિષે જાણકારી મેળવવી ,એને સમજવી અને વાસ્તવિક જીવનમાં એના ઉપયોગ ને સમજવો અને ઉતારવો એટલે શિક્ષણ … શિક્ષણ શરુ ક્યાંથી થાય ???
સોરી તમે ખોટા છો કે નર્સરી થી ..શિક્ષણ તો માં ના ગર્ભ માંથી શરુ થાય છે … ગર્ભ ના સંસ્કાર અને શિક્ષણ , માતાના વિચારો અને ડી એન એ થી એની રૂપરેખા રચાઈ જતી હોય છે … ગર્ભ માંથી બહાર આવતું બાળક પહેલા રડે કેમ છે ??? ગર્ભ માં થયો નાળ માંથી એને ખોરાક ,પોષણ ,શ્વસન મળતું પણ નાળ થી કપાઈ ગયા બાદ સૌ પહેલા એ શ્વાસ લેવા માટે રડે છે … પોતાના ફેફસાને ખોલવાની આ પદ્ધતિ એને કોઈએ શીખવી નથી …બાળક જન્મે છે ત્યારથી સ્વચ્છતા પ્રિય છે ..કુદરતી હાજત બાદ તે રડે છે અને ભૂખ લાગે તો પણ રડે છે અને એ રુદન વચ્ચે નો ફર્ક જેની સાથે જોડાણ નવ મહિના સુધી રહેલું હોય એ માં પારખી જાય છે .. માતા નું દૂધ પીતી વખતે એને કોઈ શીખવાડતું નથી …. એથી આગળ એ જેમ જેમ મોટું થાય છે તેમ તેમ પડખું ફરવું હસવું રડવું , પગલાં ભરવા એ આપોઆપ શીખતું જાય છે …અને બહુ ઓછા લોકોને ખ્યાલ આવે છે કે બાળક સામેની વ્યક્તિની નકલ પણ કરે છે . એની સાથે વાત કરતા અનુભવ્યું પણ હશે .કોઈ સ્વીચબોર્ડ તરફ હાથ લઇ જાય એટલે એની સાથે પાંખો કે લાઈટ થશે એ રીતે બાળક આંખ પણ ફેરવે છે . એ કોઈ પણ વ્યક્તિના કપડાં કે હાથ સજ્જડ પકડી રાખે એટલે સમજવું કે આમ ના કરવાથી પડી જવાશે એવો કોઈક ભય એના મનમાં હોય છે જ . એક વાર તે દાઝે તો આગ પાસે નહિ જાય …આમ જીવન પરત્વે નું શિક્ષણ જે ગર્ભ થી લઈને નીકળે છે અને આપણે પછી શીખવાડીએ છીએ મનુષ્યની જમાત માં ભળતા ….
કોઈ પણ બાળકની માં એની પહેલી શિક્ષક હોય છે અને એ કેવી રીતે શીખવે છે એના પર એના જીવનમાં મહત્વ ના બદલાવ આવે છે .
મોંઘીદાટ શાળામાં મુકવામાં આવતા બાળકો ના માતા પિતાએ કેટલાક પ્રશ્નો પર જરૂર વિચારવું જોઈએ ..શું એ આવતી કડીમાં ….

Advertisements

રંગ

હોળી અને દિવાળી આપણાં મોટા ગણાતાં તહેવારો ..દિવાળી નો તહેવાર કૈક એક મહિના જેવો લાંબો ચાલે અને હોળી બે દિવસ ..એક હોળી અને બીજી ધુળેટી .. ભક્ત પ્રહલાદ ને સમર્પિત આ તહેવાર એટલે ઓફિશિયલી ગંદા રહેવાનો દિવસ ..
બેઉ માં એક વાત સામાન્ય છે કે બેઉ સાથે આગ જોડાયેલી છે … એક માં ચાર રસ્તે સામુહિક પ્રાગટ્ય અને બીજા માં નાના નાના દીવડા માં વહેંચાયેલી આગ અને બંધ ખોખામાં એક ચિનગારી થી ફૂટતા ફટાકડા રૂપી આગ …એ આગ જયારે હોલવાય ત્યારે માત્ર રાખ જ બચે છે ..હા એનું મહત્વ ખેતી સાથે ,એક નિર્દોષ આનંદ સાથે છે પણ હવે એ આનંદ ની પણ શોધ થઇ રહી છે ..શેરી માં છૂટતી પિચકારીઓ મોંઘદાટ ક્લબો માં કેદ થઇ રહી છે …
હેપ્પી હોળી કહેતી વખતે દિલ માં કેટલા લોકો ખરેખર હેપ્પી હશે ??? અરે એટલે તો રંગ લગાડી દે થોડો કે ચહેરો વંચાય નહિ …
હવે લોકો એક દિવસ હોળી રમેં છે અને બાકીના દિવસો હોળી સળગાવે છે બીજાના જીવનમાં કેમ ???
ખુશ રહેવા માટે કોઈ બહાનું હોવું અનિવાર્ય .. એ વગર અમથા અમથા ખુશ રહેવાય જ નહિ અને કદાચ રહેતા આવડતું ના હોય એમ પણ બને ..હોળીના રંગ તો વ્રજ માં ખીલે , યુપી બિહાર માં ખરેખર લોકો રંગાઈ જાય …
આ તહેવાર માં ટોયલેટ સોપ અને શેમ્પુ વાળા ની ખાસ જાહેરાત આવવી જોઈએ પણ નથી આવતી એક ખાસ વાક્ય સાથે : કોઈ પણ પ્રયત્ન વગર ગમે તેટલો પાકો રંગ અમારા સાબુ થી પહેલી જ વાર માં નીકળી જશે અને વાળ માંથી પણ …પણ રંગ પાકો હોય છે ..ઢંગ પાકો નથી હોતો ..સંબંધો પાકા નથી હોતા . ફ્લેક્સિબલ હોય છે ..રંગ પણ કાયમી નથી હોતો અને લોકો પણ બદલાતા રહે છે .. અરે પોતાની અંદર જુઓ તો પોતે પણ ક્યાં અસલ રહ્યા છે ??? ઓરીજીનલ હું આ વખતે હોળી રમ્યા પછી શોધજો …કેટલાય પડ નીચે બેઠો હશે સંતાઈ ને અને એ પડ સુધી જવાનો સમય પણ નહિ હોય તમારી પાસે કેમ ???
આપણે માત્ર હોળી ને દિવસે નહિ પણ હંમેશા રંગાયેલા જ ચહેરા સાથે ફરતા હોઈએ છીએ બસ આપણે આપણા ચહેરા સાથે હોળી ને દિવસે મેચ કરી શકીએ છીએ ..
દરેક દિલ માં પ્રગટતી રહેતી ઈર્ષ્યા ની જ્યોત તો અંખંડ જ્યોત કહી શકાય … મારે ફક્ત એક ચહેરા ની તલાશ છે આ હોળી પર જે વર્તમાનમાં એવી રીતે જીવે કે એમાં ભવિષ્ય નું કોઈ ગણિત ના હોય અને એના ચહેરા ની રંગત જ એવી હશે કે કોઈ પણ રંગ એના પર લગાડો એ રંગ ની રંગત વધી જશે …
ધાણી ,ચણા , ખજૂર , અને ઘઉં ની સેવો વાળો ઉપવાસ હજી કરે છે લોકો …હોળી ની પૂજા પર પણ કરે છે લોકો …રંગો થી રમેં છે લોકો …
પણ …..
ફેસબુક અને વ્હોટ્સઅપ સિવાય ક્યાં કોઈ ને ગમે છે લોકો ??? (લાઈક )

ફરી એક વાર વુમન્સ ડે

8 માર્ચ ..ફરી એક વાર વુમન્સ ડે …ફરી એક દિવસ સ્ત્રીનું બહુમાન (?) અને ઘણું બધું , સ્તુતિ ગુણગાન …અને 9 માર્ચ થી જૈસે થઈ ..આજે એક નવો દ્રષ્ટિકોણ તપાસવાનું મન થાય છે ..
બાળકી ને જન્મ આપો … હા ,આપ્યો …બાળકીને ભણાવો …હા ભણાવી … બાળકીને સ્વાશ્રયી બનાવો ….પગભર બનાવો જેથી એ પુરુષ પર નિર્ભર ના રહે અને પોતાની રાહ પોતાની રીતે નક્કી કરી શકે , જરૂર પડે ઘરને મદદરૂપ થઇ શકે ….સરસ … છોકરીઓ ને વધારે ભણાવો અને આકાશને આંબતી કરો .. હા પ્રોફેશનલ કોર્સ માં હવે છોકરીઓ નું પ્રમાણ વધ્યું છે ..હવે તેનું લગ્ન કરાવો ..
હું હમણાં એકદિવસય પ્રવાસ માં ગઈ ત્યારે મેં એક બેનને એક રસપ્રદ વાત કહેતા સાંભળેલા ..જો છોકરીઓ વધારે ભણે અને એને સાથે ભણતું પાત્ર ગમી જાય તો એના લગ્ન એની સાથે કરાવી દેવાના ..જે છોકરીઓ આવું નથી કરતી તેના માટે પોતાના સમાજમાં છોકરો મળવો મુશ્કેલ થઇ જાય છે ..એક તો પ્રોફેશનલ કોર્સ કરતા ઉંમર 25-26 ઉપર જતી રહે અને પછી ક્યાંતો ઓછા ભણેલા પાત્રો હોય અને ભણેલા હોય તો એના નખરા વધારે હોય …
અને આ વાત ખરેખર સાચી છે …
ચાલો આજે ચર્ચા નથી કરવી પણ એક બાયોડેટા લખું છું :
=========================================================
નામ : પ્રણવ રમણીકલાલ (અટક)
સરનામું : ન-203, કુંજબિહારી ફ્લેટ્સ ,મયૂરગંજ , સોલારોડ , અમદાવાદ
જન્મ તારીખ : 16/01/1986 .
વજન :70 કે.જી
ઊંચાઈ : 5′-11″
અભ્યાસ : B E ( Mechanical ) , M.B.A. ( From London )
નોકરી /વ્યવસાય : રિલાયન્સ ,હજીરા ,સુરત .
આવક : 450000 -500000 વાર્ષિક .
===========================================
કૌટુંબિક વિગત :
પિતાનું નામ : રમણીકભાઇ વજેચંદ (અટક )
વ્યવસાય : રિટાયર્ડ ઓફિસર ( ગુજરાત સરકાર )
માતાનું નામ : વિશાખાબેન રમણીકભાઇ (અટક )
વ્યવસાય : પ્રિન્સિપાલ , ————-માધ્યમિક શાળા , મહેમદાવાદ .
ભાઈ : મોટાભાઈ :રક્ષિત રમણીકભાઇ ( અટક ) , ઓફિસર ઓ એન જી સી . (પરિણીત )
ભાભી : ઇશિતા રક્ષિત (અટક ) ,હાઉસવાઈફ .
બહેન : અપરાજિતા નેલસન પોન્ટિંગ , ઓસ્ટ્રેલિયા .( પરિણીત )
=====================================================
અપેક્ષિત : એન્જીનીઅરીંગ /મેડિકલ / સી એ / એમ બી એ માં અભ્યાસ , નોકરી .. ભાવિ પત્ની મારા સમગ્ર કુટુંબ નું માન સન્માન જાળવે .. ઘર ,સામાજિક જવાબદારી ,મિત્રમંડળ અને નોકરી સંભાળી શકે .અને ફ્લેક્સિબલ એટીટ્યુડ ધરાવતી સુંદર યુવતી …
=========================================================================================
આ એક લગ્નોસ્તુક યુવકનો બાયોડેટા છે ..
તમને નથી લાગતું કે છેલ્લી વિગત માં આ એક લગ્નની નહિ પણ પત્ની તરીકે ની જોબ રિક્વાયરમેન્ટ છે ???!!!!!
સમજ્યા કે જોબ માં જે પ્રમાણેની જોબ હોય તે પ્રમાણેની શૈક્ષણિક લાયકાત જરૂરી છે પણ એક જીવનસંગીની માટે અભ્યાસ કેટલી હદે ઉપયોગી ?? પરસ્પર નું સંબંધોનું મેનેજમેન્ટ વધારે અગત્યનું હોય જ્યાં સંબંધ માં આર્થિક આધાર ઉપરાંત સંવેદના ની લાયકાત વધારે ઉચ્ચ હોય ત્યાં સંવેદના ને ઉગવા માટે આકાશ જ ના મળે એવી અપેક્ષા છે ..અને હા આ વિગત માટે 10 થી 12 યુવતીઓ ના બાયોડેટા વ્હોટ્સઅપ પર મંગાવીને એમાંથી વિવિધ ઇન્ટરવ્યૂ લઈને પસંદગી કરાય અને પસંદગી પામનાર છોકરી અને માતાપિતા પોતાની જાતને ધન્ય ધન્ય સમજે … એક સોનાની દુકાને દાગીના ખરીદીએ ,શાકભાજી ખરીદીએ તે વખતે જે પસંદગીની પ્રક્રિયા હોય તેવું કશુંક એક છોકરી સાથે થતું હોય એવું નથી લાગતું ???!! એક છોકરી જે જમાનાને ચાળે ના ચઢીને ફક્ત અભ્યાસ કરીને નોકરી લાયક બને અને એની પાસે માસ્ટર્સ ડિગ્રી હોવા છતાંય લગ્નની બજાર માં ગેરલાયક ઠરે ત્યારે શું લાગે છે ??એ નવ દીકરી માંથી કોઈ એક ખરેખર એક નબળા પાસા  સિવાય બધી રીતે યોગ્ય હોઈ શકે ( એના બાહ્ય દેખાવ ) પણ એના ગુણ બધાથી વધારે હોય .. વુમન્સ ડે એના માટે એક મજાક સમો નથી લાગતો ..અને લગ્ન લાયક ના ઠરવું એટલે આ બધું વ્યર્થ ગયા નો થપ્પો લાગી જાય …શું માં બાપ દીકરાની કોઈ પણ જાતના મોહ માયા વગર અને દિકરાથી વૃદ્ધત્વ માં સહાય ની આશાએ એક લાયક છોકરી માટે એક કામ કરી શકે ???!!…
એ દીકરીને પગભર તો હોય જ પણ એક વાત જરૂર કહે ..બેટા આપણી પાસે છત તો છે જ ..તારા લગ્ન માટે તને સમજે એવો યોગ્ય પાત્ર નહિ મળે તો તું હંમેશા માટે અમારી પાસે રહી શકે છે ..તારી કારકિર્દી ને મનગમતો વળાંક આપી શકે છે .. અમે તારી સાથે જ છીએ .ગમે તેમ પણ તું અમારી સામે તો રહી શકીશ ને !! તારી ચિંતા નહિ રહે ….અને હા થોડી સમય પછી જો તને પણ માં બનવાનું મન થાય તો તું એક અનાથ બાળકને દત્તક લઈને એનો સહારો બની શકે છે .. તું ચિંતા ના કરીશ અમે તારી સાથે છીએ ..

=========================================================================================
હવે આ વુમન્સ ડે પર એક છોકરીનો બાયોડેટા :
===================================
નામ : કીર્તિ રમેશ નીના (અટક ).
સરનામું : એ -2, વ્યોમપાર્ક ,આકાશદીપ એવન્યુ , થલતેજ ,અમદાવાદ .
અભ્યાસ : એમ કોમ , ડિપ્લોમા ઈન ટેક્સેશન , સી એ( સી પી ટી )
જન્મ તારીખ : 16/09/1989
ઊંચાઈ : 5′-4″
નોકરી : ટી સી એસ ,ગાંધીનગર .
======================================

સરનામું : રમેશ વિનય (અટક ) .
વ્યવસાય : ધંધો
માતા : નીના (અટક )
વ્યવસાય : હોમમેકર .
ભાઈ : નથી .
બહેન : રીશા . ( પરિણીત )
===================================
અપેક્ષિત : મારો જીવનસાથી જો લગ્ન બાદ મને નોકરી કરાવવા માંગે તો એને મારા ઘરના દરેક કામ માં મદદરૂપ થવું પડશે . મારી પરિણીત બહેન અમેરિકા છે .એટલે એના માં બાપ ની જે રીતે હું કાળજી લઉં તે રીતે હું મારા માં બાપની કાળજી લઇ શકું એ સ્વતંત્રતા જોઈશે .. મારા પિતા જી જયારે 58 વર્ષના થાય ત્યારે હું એમને મારા પગાર માંથી અર્ધો પગાર આપીશ એ બાબતે સહમત હોવા જોઈએ . બાળકો ના ઉછેર માં પણ ખભેખભા મિલાવીને એમને સારા વ્યક્તિ બનાવી શકીએ એ માટે જાગૃત હોવા જોઈએ . અને જીવનસાથી ના માં બાપ માટે હું વહુ નહિ પણ દીકરી બનીને રહી શકું એવું સુમેળ ભર્યું વાતાવરણ બનાવવામાં મને આપ સૌનો સહકાર જોશે ..
અને હા મારી ડિગ્રી ,પગાર કે જોબ જોઈને નહિ પણ જીવનસાથી તરીકે સ્વભાવ નો સુમેળ સાધી શકે અને સંવેદના નું મૂલ્ય સમજી ને મને નારી તરીકે ગૌરવ આપી શકે, મારા વ્યક્તિત્વનો નિખાર કરી શકે અને એના જીવનમાં હું એની પ્રગતિની ભાગીદારી કરી શકું એવા હમસફર ની તલાશ છે ..
====================================================
ઇતિ …

સ્માર્ટ સીટી

તમને ખબર છે એ વ્યક્તિનું નામ જેણે સૌથી પહેલા પોતાના દીકરા કે દીકરી ને એ વાયદો કરેલો કે દસમા ધોરણ માં તું આટલા ટકા લાવે તો તને સ્કૂટી અપાવીશ અને બારમાં ધોરણ માં આટલા ટકા લાવીશ તો બાઈક !!!!
તમને એ વ્યક્તિ નું નામ ખબર છે જેને આઈ આઈ એમ માંથી પાસ આઉટ થયા પછી 10 લાખનું પેકેજ ઓફર થયેલું અને પછી મેનેજમેન્ટ વિષય નો ભાવ લોકપ્રિયતા ની એ સીમાએ પહોંચ્યો કે દરેક ડિગ્રી સાથે એમ બી એ જાણે ફરજીયાત થયું હોય ….
તમને એ વ્યક્તિનું નામ ખબર છે જેણે જીવનની સફળતા નું કારણ દસમા બારમાં ધોરણના ટકા ને બનાવી દીધેલું અને એના વગર જીવવું મિથ્યા છે એમ ઠસાવી દીધેલું ( છોકરાવ કરતા માબાપ ના મગજ માં વધારે હોં કે !!! ) .
તમારી નિષ્ફળતાઓ ને સફળતા માં બદલવાનું સાધન એટલે તમારું બાળક એવી સમજણ ફેલાવનાર અને એ નિષ્ફળ જાય તો ફ્રસ્ટ્રેશન ઉતારવાનું પણ !!! દેશના વિકાસ માં અને પોતાના વિકાસ નું એક પરિમાણ એટલે ઘરમાં કાર હોવી અને વ્યક્તિદીઠ એક દ્વિચક્રી વાહન હોવું …
આ બધું એટલે યાદ આવ્યું કે ગઈકાલે અમારા વડોદરા ના દાંડિયા બજાર નામના વિસ્તાર નું એક સીમાચિહ્ન સમું મોટું બિલ્ડીંગ : અગ્નિશાંતિ કેન્દ્ર જે બરાબર સુરસાગર તળાવની બાજુમાં જ હતું। .હા હતું જ એટલે કહું છું એને તોડી પડાયું અને એનો તૂટેલો કાટમાળ રસ્તાની ઉપર પડેલો વિશાળ ઢગલો .. હું ત્યાં થોડી મિનિટ ઉભી રહી અને મારી આંખ માંથી આંસુ આવી ગયા …મકાન જૂનું હોય અને તૂટી ગયું હોય તો કદાચ દુઃખ ના થાય પણ આ તો અડીખમ મકાન તોડી પડાયું કેમ કે રસ્તા પહોળા કરવાના છે ..વડોદરા ને સ્માર્ટ સીટી બનાવવાનું છે ..
આ એ મકાન હતું જ્યાંથી આગ હોલવાતી ..રસ્તા પર પસાર થતી વખતે એ બસસ્ટેન્ડ નું નામ હતું . હેરિટેજ બિલ્ડીંગ નહોતું પણ એથી ઓછું પણ નહોતું .. લગભગ અઢી વર્ષની ઉંમર થી વડોદરા માં વસેલી છું એટલે સ્મૃતિઓ ના પડછાયા પણ એટલા જ લાંબા અને મજબૂત છે ..
રસ્તા પહોળા કરવા પડે છે કેમ કે ટ્રાફિક વધતો જ રહે છે ..એટલે જ મેં પહેલા કહ્યું કે દસમા ના બારમા ના ટકા પર વાહન ભેટ આપ્યું એ કોણ હતું કદાચ આ વાહનો ની વસ્તી માટે જવાબદાર વ્યક્તિ . ટકા માટે કોચિંગ માં સવારે પાંચ થી રાત્રે બાર સુધીના કોઈ પણ સમય માં જવા માટે બીજું બહાનું કે બાળકને વાહન તો આપવું જ પડે … ઉદારીકરણ ની નીતિ માં લોન ની થતી લ્હાણી જેને લીધે સેકન્ડ હેન્ડ કાર પણ હોય તો વટ પડે એ માનસિકતા અને લોન ના હફ્તા ભરવા માટે કરવી પડતી વધારાની દોડધામ માં કુટુંબ જીવન ક્યાં વિખેરાઈ ગયું એ પણ સુધ ના રહી અને કહેવું પડશે કે એનો કોઈ અફસોસ પણ નથી રહ્યો …પેકેજ ની માયાજાળ પાછળ વિદેશમાં ભણીને ત્યાંજ સેટલ થવાની ઘેલછા એ લોન ના ડુંગર માં થોડો વધારો કરી દીધો અને માં બાપ ને હવે આવતા જમાના માં વૃદ્ધાશ્રમ માં જવાની જરૂર નહિ રહે કેમ કે એમના સિવાય કોઈ ઘરમાં નહિ હોય …
ઊંચા ધોરણના જીવનની લાહ્ય માં સતત તાણ અનુભવતો વિદ્યાર્થી કે યુવક આત્મહત્યા કરે તો પણ કોઈને આ સમસ્યા માટે પોતે જ જવાબદાર છે એવો મનમાં ડંખ નથી થતો એ અફસોસ નથી થતો ..
હા આમાં મેડીક્લેમ બીમારીનો ખર્ચો પાછો મેળવી આપે એટલે બીમારી આપણા દેહને પોતાનું કાયમી નિવાસસ્થાન બનાવી દે એના માટે પણ આપણને કોઈ વાંધો નથી હોતો .. દરેક વસ્તુ માંથી અહીં પૈસા કમાવાનું સાધન મળી રહે છે ..ફિટનેસ માટે જિમ જાવ અને ફીઝ ભરો ..પેલા દસમા ધોરણમાં દ્વિચક્રી વાહનને બદલે સાયકલ જ ચલાવી હોત તો જિમ ની ફી ના ભરવી પડી હોત અને રસ્તા પાર વાહનો ની ભીડ શહેરની તસ્વીર ના બદલતી હોત …
એ તો સનાતન સત્ય છે કે બદલાવ જરૂરી છે .નવા આવનાર માટે જુના એ ખસી ને જગ્યા કરવી પડે છે ..પણ આ સ્માર્ટ બનવામાં માણસે પોતાની જાતને મશીન બનાવી દીધો છે અને વિચારવાનું કામ પણ મશીન ને સોંપી દીધું છે ..જગતભરની તમામ ખબર મોબાઈલ સ્ક્રીન પર દેખાય છે એટલે દુનિયા જીવન માટે અસહ્ય બની હોય એમ લાગે છે …
લેખિકા સુશ્રી પિંકી દલાલ નું એક ફેસબુક સ્ટેટ્સ બહુ ગમી ગયું :
आप #मोबाइल , #टीवी और #अख़बार छोड़ दीजिये तो इस #दुनिया से अच्छा कुछ नहीं।